«Атамекеніміз» жайлы бірер сөз

«Атамекеніміз» жайлы бірер сөз

           Қазіргі қоғам өз өмірінің барлық аспектілерінде түбегейлі

өзгерістерді басынан өткеріп жатыр. Бүгінгі күні посткеңестік кеңістікте

модерндік шындық, дәстүрлі мәдениет құндылықтары өз маңызын жоғалтып,

постиндустриалды қоғамның алғашқы белгілері пайда болып жатқаны байқалады.

Қоғамда постмодерндік тенденциялардың қалыптасуы жастардың бойында маргиналдық

белгілердің туындауына алып келе жатқаны да қуанта қоймайды. Бір кездері «маргинал»

деп қоғамнан шеттетілген, өркениеттен қалып қойған, мақсат-мұраты жоқ, қылмыскер,

нашақор тұлғаларды, «аутсайдерлерді» атаса, қазіргі күні маргиналистік тәжірибе

өнердің барлық салаларында еркін өмір сүріп, «заман дауысы», «қоғам үніне»

айналды. Бұл жерде біз постмодернизм мен постструктурализмнің біздің қоғамға

батпандап еніп жатқанын байқай аламыз.

            Біздің елімізде постиндустриалдық

қоғамның пайда болуына ақпараттық құралдардың күрт дамуы себеп болды, қазіргі

жастар ғаламторды, ондағы шетелдік контенттерді еркін пайдалана алады, ал әрбір

өнер туындысы, кез келген музыкалық контент, әрбір медиа тауар белгілі бір

идеялық ақпаратқа, өзіндік философияға ие болады. Шетелдік музыка өнімдерін,

бейне контенттерді пайдалануы бүгінгі жастардың санасына қатты әсер етіп

келеді, олардың дүниетанымын, эстетикалық талғамын, өнер жайлы

ұғым-түсініктерін өзгертуде. Әлеуметтік лингвистика тұрғысынан алатын болсақ,

олардың тілі де осыған сай спецификалық сипатқа ие болды, жастардың өзіндік сленгтері,

протест-лозунгтері қалыптасты. Жалпы алғанда, бүгінгі тіл мен әдебиет, музыка

мен өнер, тіпті жастардың киім үлгісі де түбегейлі өзгерістерді басынан

өткеруде, жалпы өнер атаулысы, сурет, музыка, әдебиет болсын, протестік,

төңкерістік-авангардтық сипат алуда.

             Ендігі кезекте «Осыған қарсы

күресу керек пе?» деген сұрақ туындайды. Жаһандану үдерісінің күшті толқыны

біздің қоғам түгілі, бүкіл әлем жұртшылығын шайып өтті десек болады. Біздің

өмірімізде ғаламтор желісінің пайда болуы мен шетелдік контенттің үлкен ағыспен

құйылып жатқаны белгілі, ал біз бұған бөгет жасап, жас ұрпақтың талғамына

шектеу қоя алмаймыз, олардың бұған конституциялық құқықтары бар екенін де

ескерген жөн.  

             Осы мәселе жөнінде Елбасының «Болашаққа

бағдар: рухани жаңғыру»  мақаласында: «Әжептәуір

жаңғырған қоғамның өзінің тамыры тарихының тереңінен бастау алатын рухани коды

болады. Жаңа тұрпатты жаңғырудың ең басты шарты – сол ұлттық кодыңды сақтай

білу. Онсыз жаңғыру дегеніңіздің құр жаңғырыққа айналуы оп-оңай... Егер жаңғыру

елдің ұлттық-рухани тамырынан нәр алмаса, ол адасуға бастайды» - дейді.

            Біздің колледжіміз өзінің білім

және тәрбие беру ісін Елбасының осы сөздерін негізге ала отырып атқаруды жөн

санайды, осыған байланысты колледж студенттеріне ұлтымыздың озық дәстүрлерін

насихаттап, бүгінгі рухани кризиске ұшырай бастаған қоғамымызда

ата-бабаларымыздан жеткен асыл қазынамыз болған ұлттық кодымызды сақтауға деген

құлшынысты ояту – колледждің басты мақсатына айналып отыр.

             Бұл мәселе бойынша колледжімізде «Атамекен»

үйірмесі жұмыс істейді. Бұл үйірме колледж студенттерімен тәрбие жұмыстарын

жүргізе отырып, Мемлекеттік тіл дәрежесін көтеруге, ұлттық сананы оятып,

ұлтжандылықты тәрбиелеуге, ұлттық рух пен ұлттық кодты сақтауға деген

құлшынысты оятуға басты назар аударады, жергілікті ақын-жазушылармен кездесулер

өткізеді, дәстүрлі музыка кештерін ұйымдастырады, колледж студенттерімен бірге

кітапхана, музей, жастар орталықтарына саяхат жасайды, қалада ұйымдастырылып

жатқан мәдени кештерді де тыс қалдырмайды.

            Үйірме жұмысын ұйымдастыру

барысында оның заман талабына, жастар талғамына жауап беретіндігіне баса назар

аударылады. Біз осының барлығы студенттеріміздің тұлға ретінде қалыптасып,

болашақта еліміздің бәсекелестікке қабілетті, ұлтжанды, интеллектуалды

азаматтарының бірі болып шығуына өз септігін тигізеді деп үміттенеміз.

            Дәстүрлі мәдениетті місе тұтпайтын

маргиналды постмодерндік философия бір кездері таңсық көрінгенімен, бүгінгі

күні ол қоғам өмірінің барлық аспектілерінде іске жарамсыз екенін байқатып

жатыр. Айналамызға қарасақ, бұл философияның методологиясын басшылыққа алған

қоғам атаулының барлығы өз ұлттық кодтарын жоғалтып, рухани кризиске ұшырап

жатқанын көре аламыз. Ал бүгінгі жаһандану үрдісінде осы кемшіліктердің біздің

қоғамымызда орын алуын болдырмаудың жалғыз жолы – ұлттық кодымызды жаңғырту,

дәстүрлі құндылықтарымызды асқақтату, бір сөзбен айтқанда Рухани жаңғыру.